I
¡Paeci mentira,
que una cosina tan chiquinina
me jhaga sentil ganas de lloral de gozu!
¡Paeci mentira,
que una cosina tan chiquinina
me jhaga sentíl ganas de comel-la a besus!
¡Paeci mentira,
que una cosina tan chiquinina …!
¡Paeci mentira!
¡Si es que ella es la mi nietina!
¡Y yo soy el su agüelu!
II
¡Mírala! ¡jhaci pucherus!
Trai que limpie la babina
¡Qué guapina está pataleandu!
¡Mírala, mírala!
¿No has visto lo que ha jhechu?
¡Cómu se despereza!
¡Paeci qu’estira lo bracinus pa que la coja!
¡Paeci qu’entiendi lo que se le ici!
¡No ves cómu se está riendu!
¡La madri que la parió!
¡Si ni con lo s’hijus…!
¡Ay!...¡Lo bobu que nos golvemus!
¿Qué será esu que te dan lo nietus?
Que paeci que tienis un no se qué,
que no te cabi en el pechu…
¡Ay! ¡Si yo supiera escribíl,
pa contál
lo que ahora mesmu estoy sintiendu!
III
¿A quien se paeci?
Unus, dicin, que a ellus,
otrus, que a los nuestrus
Se paezca a quien se paezca,
no hay una cosina mas bonita
en la tierra.
Y si no fuera pecao,
ni en los cielus.
jmgd.
No hay comentarios:
Publicar un comentario